ꆧꌺꐤꅉꌫꅉꑟ，ꆿꍯꂶꈯꄮꇬ
ꁱꊿ:ꐙꈌꐎꑳ
ꀘꊿ:ꐙꇐꑸꆀ
ꑋꅐꍵꃹ
ꃅꈎꃄꆪꈭꏝꊰꑋꆪ
ꆿꍯꂶꈯꄮꇬ
ꆧꌺꐤꅉꌫꅉꑟꇬꎷ
ꈊꌦꄛꌦ
ꃅꑍꃅꉖꌕꉐꃘꊰꑋ
ꆿꍯꂶꈯꄮꇬ
ꆧꑭꐤꅉꎔꅉꑟꇬꎷ
ꆧꌺꐤꅉꌫꅉꑞꄮꇬ
ꆧꑭꐤꅉꎔꅉꑞꄮꇬ
ꀿꉂ꒜ꉂꉁꆏ꒿ꀕꐚꀐꂼ
ꀺꃅꑳꃅꐋꀨꃺꑌꐊ
ꉔꃅꄏꃅꏣꑟꃶꌐꐊ
ꇮꃅꑴꃅꇗꅉꏦꃤꌬ
ꃥꌵꄹꉇꌳꉔꄻꄉꇌꄡꌉ
ꌤꀞꄮꇬꎬꅧꄷꄉꎆꄡꊪ
ꐋꏑꄹꉇꈩꌒꄷꄉꑵꄡꀨ
ꀉꄉꇆꀉꄉ
ꀃꑍꋋꄮꋧꃅꂿꃅꇢꑴꇬ
ꀿꅇꎸꇹꋯꌠ
ꈍꃅꄿꂿꎺꇊꐝꄧꀕꇬꎷ
ꈍꄮꇬꑌꉄꇊꄟꇈꃅꇬꎷ
ꉠ꒜ꉡꐞꋧꃅꂿꃅꇢꁧꄮ
ꆧꌺꐛꒆꆧꑭꄡꇗꐍꂿꀕ
ꀉꂿꇆꀉꂿ
ꈍꃅꀋꎺꇁꉆꂯ
ꀊꄶꌷꎹꌷꈹꉷꃅꏹꄮꇬ
ꀉꂿꆎꆹ
ꎅꎹꋚꈹꑬꌋꌔꏢꐔ
꒔ꄙꎹꑌꌌꇁꌻ꒧ꌶꁌꄻ
ꑍꄙꎹꑌꌌꇁꌻ꒧ꌶꁌꄻ
ꏦꏪꇓꂃꈍꑋꆏꋒꋺꀋꐚ
ꌩꑱꂷꑱꈍꑋꆏꉀꋺꀋꐚ
ꀉꂿꆎꆹ
ꎅꎹꋚꈹꇇꌋꌔꏢꂵ
꒔ꉐꊌꑌꆎꌌꌻ꒧ꌶꁌꃅ
ꑍꉐꊌꑌꆎꌌꌻ꒧ꌶꁌꃅ
ꁮ꒰ꈍꑋꆏꐂꋺꀋꐚ
ꀌꀠꈍꑋꆏꄔꋺꀋꐚ
ꅽꐥꐨꁮꅉꆹ
ꈍꑋꉢꁳꎺꇁꈧꊰꀕꇈꃲ
ꅽꎭꐪꌒꐨꆹ
ꈍꑋꉢꁳꉪꇊꑓꁴꅐꇈꃲ
ꆿꍯꂶꈯꄮꇬ
ꆧꌺꐤꅉꌫꅉꑟꇬꎷ
ꆧꑭꐤꅉꎔꅉꑟꇬꎷ
ꀊꄶ，ꉠꃅ
ꑳꉎꁧꐙ
ꑌꑿꁦꒌꄀꀕꌦꀋꐚ
ꑳꐯꐦꐛ
ꆿꇁꍯꒌꄀꀕꌦꀋꐚ
ꃮꆫꀊꉘꃮꆫꇌꆫ
ꇢꇑꋛꋚꄁꄂꌦꀋꐚ
ꑿꆫꀉꐔꑌꆫꑿꆫ
ꁧꇁꇉꄩꏭꏮꌦꀋꐚ
ꆿꍯꌌꁈꈾꋩꈾꆗ
ꄸꉺ꒰ꊂꉆꀕꌦꀋꐚ
ꀊꉘꌠꆗꂁꄉꍃꄉ
ꆀꃅꉁꏣꎹꀕꌦꀋꐚ
ꀋꃋꑮꆜꇕꈭꀕꃅ
ꉼꉹꉁꅇꄛꄜꌦꀋꐚ
ꀙ꒜ꀉꁌꒌꈎꒋꁤ
ꀙꏳꂾꃚꌑꌒꌦꀋꐚ
ꀒ—
ꆧꌺꐤꅉꌫꅉꑟꇬꎷ
ꆧꑭꐤꅉꎔꅉꑟꇬꎷ
ꆿꍯꂶꈯꄮꇬ
ꁱ
ꊿ
ꃆꂮ
ꐙꈌꐎꑳ，ꆺꃅꏪꐦꈫꑌꇁꄿꄷꑠꈚꇬꄉꒆꌠ。ꂴꊁꃅꁱꇐꀉꑌꈨꁱꌊ《ꊿꋅ》、《ꀊꉘꌠꏀꁱ꒜》、《ꆃꎭꉜꇐꁱꀕ》ꋋꈨꇬꄀꋺ，ꁱꌊ“ꆀ꒿ꊅ”、“ꌧꍧꆀ꒿ꅇꁊ”ꌊꆀꀉꁁꑠꇬꑌꄀꋺ。ꁱꇐꄹꁆꆏꌋꌊ《ꍏꇩꆈꌠꀋꃅꋋꄮꆀ꒿ꀕꇐꉻꏑꄉꌠ》、《ꃅꋊꃨꀕꅿꉗꄙꈎꌒ》ꄷꁱꇐꌋꏑꄉꋋꈨꇬꇱꄉ。
